Onintza Enbeita Madrilgo Kongresuan eseriko da egunotan, Amaiur koalizioko diputatu. Baina elkarrizketa hau lehenago egindakoa da, ezer jakin aurretik. Beraz, politika kontu gutxi aurkituko duzue bertan, apirilaren hasierako berriketaldiari galdera bakar bat erantsi diogulako, ezer kendu barik. Izan ere, beste kontu guztien gainetik, Onintza bertsolaria da. Zer, bestela, Enbeita abizena edukita? Bada, kazetaria. Edota iritzi-emailea, Berria egunkariko zutabean. Irakaslea ere bada, bertso eskoletan eta Labayru ikastegian ibilia. Hainbat sari irabazi ditu bertso idatziekin, eta 2010eko Bizkaiko Bertsolari Txapelketan laugarren postua lortu zuen, orain arteko onena. Onintza Enbeita (Muxika, 1979) saltsa askotako perrexila da. Pentsa! Duela urte batzuk kabaretera ere izan zen Emetik Bertso Kabareta emankizunean... Ai, aitona Balendinek burua altxatuko balu! M. Egimendi. Argazkiak: Mikel Martinez de Trespuentes.